Telugu Stories A popular Proverb Story

Telugu Stories A popular Proverb Story

Grandmas Stories presents you telugu stories

అందితే జుట్టు, అందకపోతే కాళ్ళు

అనగనగా ఒక అడవి ఉంది. ఆ అడవిలో ఒక తాబేలు ఉండేది. ఆ అడవికి రాజైన సింహం ఈ తాబేలుతో ఎంతో స్నేహంగా ఉండేది.

ఆ అడవిలో అన్ని జంతువులకీ తినటానికి తిండి, తాగటానికి నీరు పుష్కలంగా ఉండేవి. అందువలన అన్ని జంతువులూ చాలా చక్కగా కలసి మెలసి స్నేహంగా ఉండేవి.

అలాంటిది ఆ అడవిలోకి ఒక జిత్తులమారి నక్క కొత్తగా వచ్చింది. దానికి ఈ అడవిలో అన్ని జంతువులూ ఏ గొడవ లేకుండా ప్రశాంతంగా స్నేహంగా ఉండటం అస్సలు నచ్చలేదు.

ఇంక ఆ జిత్తులమారి నక్క ఎలా ఆ అడవిలో అన్ని జంతువుల మధ్య గొడవ పెట్టాలా అని ఆలోచించటం మొదలు పెట్టింది.

ఒక్కొక్కరి దగ్గర ఒక్కొక్క మాట చెప్పి అందరి మధ్య తంపులు పెట్టడం మొదలు పెట్టింది.

చెరువు దగ్గర ప్రశాంతంగా నీళ్లు తాగుతున్న ఏనుగు దగ్గరికి వెళ్లి "ఏనుగు మామ! ఏనుగు మామ! నీ గురించి ఆ కుందేలు ఏముందో తెలుసా?" అని అడిగింది.

వెంటనే ఏనుగు "ఆ చెప్పు నక్క బావ! ఆ కుందేలు నా గురించి ఏమనింది?" అని అడిగింది.

ఆహా!! నా పథకం పారింది అని అనుకుని, "నీవు చాలా లావుగా ఉంటావంట, నీకు పెద్ద తొండం అంట, నీ చెవులు ఎంతో పెద్దవిగా వింతగా ఉంటాయంట, అని అంది ఆ కుందేలు" అని చెప్పింది జిత్తులమారి నక్క.

ఇంకేముంది వెంటనే కుందేలుకి ఏనుగుకీ గొడవ మొదలైంది.

ఇలా ఆ అడవిలోని అన్ని జంతువులకీ ఒకరంటే ఒకరు పడకుండా చేసింది.

ఒక రోజు ఆ జిత్తులమారి నక్కకి తాబేలు మాంసం తినాలని అనిపించింది. వెంటనే ఒక ఉపాయం అలోచించి తాబేలు స్నేహితుడైన రాజు సింహం దగ్గరికి వెళ్లి "ఓ రాజా!! నిన్న రాత్రి నాకు ఒక కల వచ్చింది. అందులో ఒక ముని నాకు కనిపించి నీవు గనుక తాబేలు మాంసాన్ని తింటే నీవు ఈ అడవికే కాకుండా అన్ని అడవులకీ రాజువి అవుతావని చెప్పాడు." అని అంది.

వెంటనే సింహం "కానీ నేను తాబేలుని ఎలా తినగలను? అది నా స్నేహితుడు" అని అంది.

దానికి జిత్తులమారి నక్క"నాకు వచ్చిన కల నీతో చెప్పను, ఆపైన నీ ఇష్టం. ఆ తాబేలు గనుక నీ నిజమైన స్నేహితుడైతే నీవు అన్ని అడవులకీ రాజువయితే అది కూడా ఆనందిస్తుంది కదా!! ఈ చిన్న త్యాగానికి వెనుకాడుతుందా ఏమిటి?" అని అంది.

సింహం ఆ జిత్తులమారి నక్కమాటలని నిజమని నమ్మి తన స్నేహితుడైన తాబేలుకి విషయం చెప్పి దానిని తినటానికి వెళ్ళింది.

తాబేలు ఏంతో తెలివైనది. సింహం దాని దగ్గరికి వెళ్లి విషయం మొత్తం చెప్పింది.

అంతా విన్న తాబేలుకి అసలు విషయం అర్థమయ్యింది. అదే కాకుండా ఈ మధ్య అడవిలో జంతువులన్నిటి మధ్య వస్తున్న గొడవలకి కూడా ఈ జిత్తులమారి నక్కే కారణమని తాబేలు తెలుసుకుంది. అన్ని జంతువులూ తాబేలు దగ్గరికి వచ్చి వాటి గురించి, "ఆ కుందేలు ఇలా అందని నక్క చెప్పింది.....", లేకపోతే "ఆ జింక ఇలా అందని నక్క చెప్పింది.....", అని తాబేలుతో చెప్పాయి.

ఆ జిత్తులమారి నక్కకి గుణపాఠం చెప్పటానికి ఇదే సరైన అవకాశం అనుకుని తాబేలు సింహంతో "రాజా!! నీవు చెప్పింది విన్న తరువాత నాకు ఎంతో ఆనందం కలిగింది. నీకు అన్ని అడవులకీ రాజయ్యే గొప్ప అదృష్టం నన్ను తినటంతో వస్తుందంటే నేను ఆనందంగా నీకు ఆహారం అవుతాను. నా మిత్రుడు అంత గొప్పవాడైతే నాకే గర్వం." అని అంది.

ఇది విన్న సింహం "ఆహా నీవు నా నిజమైన మిత్రుడివి, అందుకే సరిగ్గా నక్క బావ చెప్పినట్టే మాట్లాడావు." అని అంది.

దానికి తాబేలు "అవును మిత్రమా!! మనందరి మంచి గురించి ఎంతో ఆలోచించే నక్క బావకి మనం ఏమి ఇచ్చి ఋణం తీర్చుకోలేము, కానీ ఇంత గొప్ప పనికి మంచి ముహూర్తం పెట్టుకుని అప్పుడు తిందువు నన్ను, వెంటనే నీవు అడవులన్నిటికీ రాజువైపోతావు." అని అంది.

తన స్నేహితుడు తన మంచి గురించి ఇంత అలోచించి చెప్పేసరికి సింహం ఆనందంగా తాబేలు చెప్పినదానికి ఒప్పుకుని అక్కడి నుంచి వెళ్ళిపోయింది.

నిర్ణయించిన రోజు, సమయం రానే వచ్చింది, అడవిలోని జంతువవులన్నీ సింహం చెప్పిన స్థలానికి చేరుకున్నాయి. ఇక ఆ జిత్తులమారి నక్క ఆనందానికి హద్దులు లేవు. ఇంకొద్దిసేపటిలో ఆ సింహం తినగా మిగిలిన తాబేలు మాంసాన్ని ఆనందంగా తిందామని ఎదురుచూస్తోంది.

ఇంతలో తాబేలు రానే వచ్చింది, వస్తూనే తాబేలు సింహంతో " రాజా నీకు వెంటనే ఒక విషయం చెప్పాలి" అని అంది.

సింహం "సరే" అంది.

అప్పుడు తాబేలు "రాజా!! మొన్న నక్క బావ కలలో కనిపించిన ముని నిన్న రాత్రి నా కలలో కనిపించి, నేను ఏ నక్క కలలోనైతే కనిపించి ఈ విషయం చెప్పానో ముందు ఆ నక్కని తిన్న తరువాత నిన్ను తినాలి అప్పుడే ఆ సింహం అన్ని అడవులకి రాజు అవుతుందని చెప్పాడు." అని అంది.

అప్పుడు సింహం "ఓసి ఇంతేనా!! నా కోసం నక్క బావ ఈ మాత్రం చేయలేడా!!" అని అంటూ ఆ జిత్తులమారి నక్క దగ్గరికి వెళ్ళింది.

వెంటనే ఆ జిత్తులమారి నక్క తన పని అయిపొయింది అని అనుకుని, ఆ తెలివైన తాబేలు తన గుట్టు బయటపెట్టడానికి ఇదంతా చేసిందని అర్థం అయ్యి, "ఓ రాజా!! నన్ను క్షమించు!! నిజంగా నాకు ఏ కలా రాలేదు, ఆ తాబేలు మాంసం తినాలని ఈ నాటకం ఆడాను. నన్ను తినకు" అని సింహం కాళ్ళ మీద పడింది.

ఇదంతా విన్న సింహం, తాబేలు, ఆ అడవిలోని జంతువులూ, అన్నీ ఆ జిత్తులమారి నక్క దుర్బుద్ధి అర్థం చేసుకున్నాయి. వెంటనే సింహం ఆ జిత్తులమారి నక్కని ఆ అడవి నుంచి తరిమి కొట్టింది.

తెలివైన తాబేలు చేసిన మంచి పనికి ఆ అడవిలోని జంతువులన్నీ అభినందించాయి.

అప్పటినుంచీ మళ్ళీ ఆ అడవిలోని జంతువులన్నీ తిరిగి ఎంతో స్నేహంగా, ఆనందంగా, ఒకరికి ఒకరు సహాయం చేసుకుంటూ ప్రశాంతంగా జీవించసాగాయి.

అందుకే అన్నారు పెద్దలు "అందితే జుట్టు, అందకపోతే కాళ్ళు" అని.

అంటే ఎవరైనా వారు చెప్పింది సాగినంత కాలం ఎంతో గొప్పవారిగా ఉంటూ, వారికి వారి చేష్టల వల్ల ఏదైనా హాని జరుగుతుందని తెలియగానే ఎదుటి వ్యక్తుల కాళ్ళ మీద పడటానికి కూడా సిద్ధమయ్యే వారి గురించి చెప్పేటప్పుడు ఈ సామెతని ఉపయొగిస్తారు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Grandma Telugu Stories From Telugu Proverbs

Grandmas Stories presents you telugu stories

Grandma Telugu Stories From Telugu Proverbs

అర్థం చేసుకునే భర్త ఉంటే ఆ భార్యకి అన్నీ కలిసి వస్తాయి

రాజారావు, రమణి ఇద్దరూ భార్యా భర్తలు. రాజారావు పెద్ద వ్యాపారస్తుడు. రమణి చాలా అందంగా, వినయంగా ఉందని మధ్యతరగతి అమ్మాయైనా తనకి బాగా నచ్చి రాజారావు ఆమెని వివాహం చేసుకున్నాడు.
ఇద్దరూ అన్యోన్యంగా ఉంటున్నా రమణికి తన భర్తతో ఎక్కువసేపు గడపాలని ఉండేది.

కానీ రాజారావు పెద్ద వ్యాపారస్తుడు అవటంతో అతనికి ఆ పనుల ఒత్తిడి వలన ఎక్కువసేపు ఆఫీసులో గడపాల్సి వచ్చేది, ఇంటికి వచ్చేసరికి పొద్దుపోయేది. రమణి ప్రతి రోజూ భర్త గురించి ఎదురుచూసి అతను త్వరగా ఇంటికి రానందుకు బాధపడేది.

ఇలా ఉండగా వారి ఇంటి పక్కన ఉన్న ఖాళీ స్థలంలో ఒక చిన్న గుడిసె ఉండేది. అందులోకి కొత్తగా భార్య, భర్త వచ్చి చేరారు. వాళ్ళు రోజూ పొద్దున్నే పనిలోకి వెళ్లి, సాయంత్రం ఇంటికి వచ్చిన తరువాత ఆనందంగా ఇద్దరూ కలిసి ఇంటి పని చేసుకునేవారు.

రోజూ రమణి వీళ్ళని చూస్తూ తన భర్త కూడా తనతో అలా ఉండాలని కోరుకుంటూ భర్తని సతాయించటం మొదలుపెట్టింది. రాజారావు ఎంత ప్రయత్నించినా అతనికి త్వరగా రావటం కుదరటంలేదు. ఇక భార్య బాధ చూడలేక ఒక పని చేయాలని అనుకున్నాడు.

ఒక రోజు తెల్లవారు ఝామున 950 రూపాయలు డబ్బు మూట తీసుకువచ్చి పక్కనేవున్న గుడిశె దగ్గరకి వెళ్లి వారి గుమ్మం ముందు పెట్టి వచ్చాడు.

తెల్లవారి పనిలోకి వెళదామని లేచిన భార్య భర్తలిద్దరూ, తలుపు తీసి గుమ్మం ముందున్న మూటని చూసి, అందులోని డబ్బు చూసి ఆశ్చర్యపడి వెంటనే లెక్కపెట్టుకున్నారు. అందులో 1000 రూపాయలకి 50 రూపాయలు తక్కువగా ఉన్నాయి. అప్పుడు ఆ భార్యా భర్తలిద్దరూ ఆ 950 రూపాయలని ఎక్కువగా పనిచేసయినా 1000 రూపాయలు చేయాలని అనుకుని, ఆ రోజు ఎక్కువగా పనిచేసి ఇంటికి ఆలస్యంగా వచ్చారు.

ఇంక ఆ రోజు నుంచి డబ్బు ఎక్కువగా సంపాయించాలనే కోరిక వాళ్లలో కలిగి, వారిద్దరూ ఎక్కువగా పని చేసి ఆలస్యంగా ఇంటికి రావటం మొదలుపెట్టారు. వాళ్ళు ఇంటి దగ్గర సరదాగా గడపటం తగ్గిపోయింది.

ఇది రోజూ చూస్తున్న రమణి ఎంతో బాధపడి అదే విషయం భర్త రాజారావుతో చెప్పింది. అది విన్న రాజారావు తన ఎత్తు పారినందుకు మనసులోనే సంతోషపడి, భార్యని ఓదారుస్తూ నువ్వేం బాధపడకు సంపాదించుకోవాలి అని అనుకున్నప్పుడు ఇవన్నీ గుర్తుకు రావు, ఇప్పడు సంపాయించకపోతే ఇంకెప్పుడు సంపాదిస్తారు.

నేను కూడా ఇక నుండి సాధ్యమైనంత వరకు ఇంటికి త్వరగా వస్తాననటంతో రమణి భర్త తనను అర్థం చేసుకున్నందుకు ఎంతో సంతోషపడింది.

అందుకే అన్నారు పెద్దలు "అర్థం చేసుకునే భర్త ఉంటే  అన్నీఆ భార్యకి కలిసి వస్తాయని."

అంటే పై కథలో చెప్పిన విధంగా భార్య భర్తలిద్దరూ ఒకరిని ఒకరు అర్థం చేసుకుని సుఖంగా జీవించటం అని.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Grandma Stories Telugu proverb story

Grandmas Stories presents you telugu stories

Grandma Stories Telugu proverb story

పిట్ట పోరు, పిట్ట పోరు పిల్లి తీర్చింది

ఒక గ్రామంలో రెండు పిల్లులు ఉన్నాయి. ఆ పిల్లులు ఆ గ్రామంలోని ఇళ్లల్లో తిరుగుతూ వారి ఇళ్లల్లోని పాలూ, పెరుగూ దొంగతనంగా తింటూండేవి. ఆ రెండిటిలో ఎవరికి ఆహారం దొరికినా అవి రెండూ సమానంగా పంచుకుని తినేవి. 

ఒకరోజు రెండు పిల్లులూ కలిసి ఆహారం కోసం వెతుకుతుండగా వాటికి ఒక తాళం పెట్టిన ఇల్లు కనిపించింది. ఇక ఆ రెండు పిల్లుల ఆనందానికి అంతే లేదు. ఆ ఇంటి దొడ్డి వైపు నుంచి ఆ ఇంటిలోకి ప్రవేశిసించి, ఏమైనా తినటానికి దొరుకుతుందేమోనని వెతకసాగాయి.

వారి వంట ఇంటిలో ఆ రెండు పిల్లులకి కొంచెం గిన్నెలో మిగిలిఉన్న పాలు, ఒక పెద్ద రొట్టె ముక్క కనిపించాయి. వెంటనే పిల్లులు రెండూ పోటీపడి మరీ ఆ మిగిలిన పాలు తాగేశాయి. పక్కనే ఉన్న చెట్ల దగ్గరికి వెళ్లి ఆ రొట్టెని తిందామని అక్కడ ఉన్నపెద్ద రొట్టెని తీసుకుని బయటికి వచ్చాయి.

ఇక ఆ పెద్ద రొట్టెని రెండు సగాలుగా పంచుకున్నాయి. కానీ మొదటి పిల్లి రెండో పిల్లితో "తనకు తక్కువ రొట్టె ముక్క వచ్చింది నీకు ఎక్కువ రొట్టె ముక్క వచ్చింది, ఇది న్యాయం కాదు" అని అంది.

అప్పుడు రెండో పిల్లి "లేదు లేదు నాకు నీకన్నా తక్కువ రొట్టె ముక్క వచ్చింది అందువలన నీ రొట్టె ముక్కలోంచే నాకు మరికొంత ఇవ్వు." అని అంది.

ఇదంతా చెట్టు మీద దూరం నుంచి గమనిస్తున్న కోతి చక చకా అక్కడికి వచ్చి "మిత్రులారా!! ఏమిటి సంగతి? దేనికో గొడవపడుతున్నట్టు కనిపిస్తోంది, విషయం ఏంటో తెలిస్తే నేనేమైనా సహాయం చేయగలనేమో చూస్తాను" అని అంది.
అప్పుడు మొదటి పిల్లి చూడు మిత్రమా "నీవే న్యాయం చెప్పు, ఈ రెండు రొట్టె ముక్కలలో ఏది పెద్దదిగా ఉంది?" అని అంది.

వంటనే రెండో పిల్లి "చూడు మిత్రమా నా రొట్టె ముక్క, ఆ రొట్టె ముక్కకన్నా చిన్నగా ఉంది." అని అన్నది.
ఇలా రెండు పిల్లులూ నా రొట్టె ముక్క చిన్నదంటే, నా రొట్టె ముక్క చిన్నదని గొడవపడుతుంటే ఆ కోతికి చటుక్కున ఒక ఉపాయం వచ్చింది.

అప్పుడు ఆ కోతి "మిత్రులారా!! అయ్యో!! ఇంత చిన్న విషయానికి గొడవ పడుతున్నారా, నేను మీ సమస్యను క్షణాల్లో పరిష్కరిస్తాను." అని అన్నది.

అలా అని ఆ రెండు రొట్టె ముక్కలని తన చేతిలోకి తీసుకుని ఒక రొట్టె ముక్కని కొంచెం తిని, "ఆహా ఇప్పుడు చూడండి రెండు రొట్టె ముక్కలు సరిసమానంగా ఉన్నాయి" అని అంది.

మళ్లీ వెంటనే "అరెరే!! లేదు, లేదు ఇప్పుడు ఈ ముక్క పెద్దదిగా ఉంది అంటూ రెండో రొట్టె ముక్కని కొంచెం తినింది." తిని ఇలా అంది, "ఆహా! ఇప్పుడు చూడండి రెండు రొట్టె ముక్కలు సరిసమానంగా ఉన్నాయి."

ఇలా ఆ తెలివైన కోతి ఆ రెండు రొట్టె ముక్కలనూ ఒకసారి ఇది పెద్దది, ఇంకొకసారి అది పెద్దది అని ఆ రెండు రొట్టె ముక్కలనూ పూర్తిగా తినేసింది.

పక్కనే ఉన్న పిల్లులూ రెండు ఎవరిది పెద్ద రొట్టె ముక్క అని ఆశక్తిగా గమనిస్తున్నాయి. చూస్తుండగానే, ఆ రెండు రొట్టె ముక్కలనూ తినేసిన కోతి చటుక్కున ఒక్క గెంతు గెంతి పక్కనే ఉన్న చెట్టుమీదకి దుమికి "వెర్రి పిల్లులరా!! మీ రెండు ముక్కలూ నాకు తినటానికి ఇచ్చినందుకు ధన్యవాదాలు!! పిట్ట పోరు, పిట్ట పోరు పిల్లి తీర్చింది" అని అక్కడినుంచి తుర్రున మాయమైంది.

అందుకే అన్నారు పెద్దలు "పిట్ట పోరు, పిట్ట పోరు పిల్లి తీర్చింది" అని.

అంటే ఎవరైనా ఇద్దరు గొడవపడుతుంటే వారి మధ్యలో మూడో వ్యక్తి దూరి ఆ ఇద్దరినీ మోసం చేసి తాను లాభం పొందినప్పుడు ఈ సామెతను ఉపయోగిస్తారు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Telugu Moral Stories From Grandma

Grandmas Stories presents you telugu stories

Telugu Moral Stories From Grandma

విచక్షణతో కూడిన కోరిక శ్రేయస్కరం

సత్యపురం అనే ఊరిలో పాపయ్య అనే వ్యక్తి ఉండేవాడు. అతనికి భార్య ఒక కూతురు ఉన్నారు. అతనికి చాలా బంగారం సంపాదించాలనే ఆశ ఉండేది. ఆ ఆశతో పాపయ్య శివుడి గురించి తపస్సు చేశాడు.

కొంత కాలానికి శివుడు ప్రత్యక్షం అయ్యి పాపయ్యను "ఎం కావాలో కోరుకో పాపయ్య" అన్నాడు.

పాపయ్య వెంటనే "తాను ముట్టుకున్నదంతా బంగారం కావాలి" అని అన్నాడు.

ఒక నిమిషం ఆలోచించి కోరుకోమని శివుడు హెచ్చరించాడు.

కానీ పాపయ్య వినలేదు తనకు బంగారు వరమే కావాలన్నాడు.

శివుడు "తథాస్తు!!!!!" అని మాయమయ్యాడు.
పాపయ్య తన ఇంటికి వచ్చాడు. ఇల్లంతా తడిమి చూశాడు. ఇల్లు అంతా బంగారం అయిపోయింది.

ఇంట్లో అన్నివస్తువులు తడిమి చూశాడు, అన్నీ బంగారం అయిపోయాయి.

ఇంతలో పాపయ్య కూతురు నాన్న అంటూ దగ్గరికి వచ్చింది.

తన కూతురుని ఆనందంగా ఎత్తుకున్నాడు, ఇంకేముంది కూతురు కూడా బంగారం అయిపోయింది.

ఇంట్లోకి వెళ్లి మంచి నీళ్లు తాగుదామనుకుని నీళ్లు గ్లాసులోంచి నోట్లో పడిందే, మంచినీళ్లు కూడా బంగారం అయిపొయింది.

ఇదంతా చూస్తున్న పాపయ్య భార్య వచ్చి దీని వలన మీరు ఏమి సాధించగలిగారు అని బాధపడసాగింది.

బాధపడుతున్న పాపయ్య తనకు తెలియకుండానే తన చేతులు తన నెట్టి మీద పెట్టుకున్నాడు. తాను కూడా బంగారం అయిపోయాడు.

అందుకే అన్నారు పెద్దలు "విచక్షణతో కూడిన కోరిక శ్రేయస్కరం" అని.

హద్దులు మీరినటువంటి ఆశ నరకం అవుతుంది.
ఏదైనా కోరుకునేటప్పుడు విచక్షణని ఉపయోగించాలని దీని వలన మనం తెలుసుకోవాలి.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

GRANDMA TELUGU TALES

Grandmas Stories presents you telugu stories

GRANDMA TELUGU TALES

దుష్టులకి దూరంగా ఉండాలి

విద్యారణ్య అడవిలో ఒక తోడేలు ఉండేది. ఆ తోడేలు మిగతా అన్ని జంతువులనీ మోసం చేస్తూ ఉండేది. ఒక రోజున తోడేలు దృష్టిలో బాగా బలిసిన కోతి కనిపించింది.

తోడేలుకు కోతి యొక్క గుండెను తినాలనిపించింది. అప్పటినుంచి తోడేలు కోతితో స్నేహంగా ఉండటం మొదలుపెట్టింది.

మిగతా జంతువులు తోడేలుతో స్నేహం పనికిరాదని కోతికి చెప్పాయి. కానీ కోతి వాటి మాట వినలేదు. ఈ విధంగా కొన్ని రోజులు జరిగాయి. 

బాగా నమ్మకం ఏర్పడిన తరువాత ఒక రోజున తోడేలు కోతిని దిట్టమైన అడవిలోకి తీసుకుని వెళ్ళింది. అక్కడ తోడేలు కోతితో చాలా రోజులుగా నీ గుండెకాయ తినాలని ఉంది అందుకే నీతో స్నేహం చేశాను. ఇప్పుడు నీ గుండెకాయ తినేస్తాను అని అన్నది.

అప్పుడు కోతి తన తోటి జంతువులు చెప్పిన మాట విననందుకు బాధపడింది. కోతి తెలివిగా అలోచించి ఇలా చెప్పింది, "మిత్రమా!! నీకు నా గుండెని ఇచ్చేదానికి ఎటువంటి అభ్యంతరం లేదు. నువ్వు ఇంతలా అడగాలా!! కానీ నా గుండె చెట్టు మీద పెట్టి వచ్చాను. నీవు నాతో వస్తే నా గుండె నీకు ఇచ్చేస్తాను. "

దీనికి మూర్ఖురాలైన తోడేలు సంతోషంగా ఒప్పుకుని కోతితో పాటు చెట్టు దగ్గరికి వచ్చింది.

ఆ సమయానికి మిగతా జంతువులన్నీ అక్కడికి చేరుకున్నాయి, కోతి మిగతా జంతువులన్నిటికీ జరిగిన విషయం చెప్పింది. అన్ని జంతువులూ కలసి తోడేలును తన్ని తరిమేశాయి.

అందుకనే "దుష్టులకు దూరంగా ఉండమని" చెప్తారు.

అంటే ఎవరైనా చెడ్డవారు అని తెలిసి వారితో స్నేహం చేయటం మంచిది కాదు అని అర్థం. పై కథలో చెప్పినట్టు చెడు ప్రవ్రుత్తి కలిగినవారిని ఎప్పుడూ నమ్మకూడదు అని అర్థం.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Wonderful Telugu Stories To Read

Grandmas Stories presents you telugu stories

Wonderful Telugu Stories To Read

తనకు మాలిన ధర్మం మొదలు చెడ్డ బేరం

అనగనగా ఒక కీకారణ్యం అనే అడవి ఉండేది. ఆ అడవిలో ఒక గాడిద ఉండేది. ఆ గాడిద చాలా విచారంగా నిలబడి ఉంది. 

అటుగా వెళుతున్న ఒక తోడేలు ఆ నిలుచున్న గాడిద దగ్గరికి వెళ్లి "ఏమిటి అలా ఉన్నావు?" అని అడిగింది.

 అప్పుడు ఆ గాడిద, తోడేలుతో ఇలా అంది "నాకు స్నేహితులెవరు లేరు. అందువలన నేను ఎప్పుడూ ఒక్కదాన్నే కూర్చుని ఇలా విచారంగా ఉంటున్నాను."

అది విన్న ఆ తోడేలు "అయ్యో! అలా అయితే ఇకనుంచి నేను నీ స్నేహితుడిగా ఉంటాను." అని అంది.
అప్పటినుంచి ఆ తోడేలు, గాడిద కలిసి మెలిసి ఆ అడవంతా తిరుగుతూ ఆనందంగా ఉండసాగారు.

ఆలా తిరుగుతూ తిరుగుతూ ఒక రోజు ఆ అడవి చివర ఉన్న గ్రామానికి చేరుకున్నారు. అక్కడ బాగా పండి మంచి వాసన వస్తున్న పండ్ల తోటలు కనిపించాయి. వెంటనే వాటికి ఆ పండ్ల తోటలోకి వెళ్లి ఆ పండ్లు తినాలనిపించింది. ఆ గాడిద, తోడేలు మెల్లగా ఆ తోటలోకి వెళ్లి కావలసినన్ని పళ్ళు తృప్తిగా తిన్నాయి.

ఆ గాడిద, తోడేలు తృప్తిగా తిని చెట్టు నీడలో చల్లటి గాలికి విశ్రాంతి తీసుకుంటున్నాయి . అప్పుడు గాడిద "ఆహా! మిత్రమా! మంచిగా తిన్నాం, చెట్టునీడలో విశ్రాంతి తీసుకుంటున్నాం, ఇంక ఒకే ఒక్కటి చేయాలని ఉంది." అని అంది.

దానికి ఆ తోడేలు నీకు ఇంకేమి కావాలి మిత్రమా అంది.
అప్పుడు ఆ గాడిద "నాకు మంచి పాట పాడాలని ఉంది! వింటావా మిత్రమా!" అని అంది.

గాడిద మాటలు విని ఉలిక్కిపడిన తోడేలు "నీవు పాటలు పాడతావా? అయినాకానీ ఇది పాటలు పాడటానికి సరైన ప్రదేశమూ కాదు, సమయమూ కాదు. నీ పాట విని ఈ తోట కాపరి వస్తే ఇంకేమైనా ఉందా, పట్టుకుని తంతాడు." అని అంది.

కానీ గాడిద ఎవరి మాట వినే పరిస్థితిలో లేదు. తోడేలు మాట కూడా పూర్తవకుండానే ఆ తెలివితక్కువ గాడిద ఓండ్రపెడుతూ పాడటం ప్రారంభించింది.

అది పాటందుకోగానే తెలివైన తోడేలు ఒక చెట్టు చాటుగా వెళ్లి వింటోంది.
ఇంకేముంది గాడిద పెద్ద, పెద్ద అరుపులకి మెలుకువ వచ్చిన తోట కాపలావాడు పరిగెత్తుకుంటూ వచ్చి దుడ్డు కర్రతో ఆ పాట పాడుతున్న గాడిదని బాగా కొట్టి వెళ్ళాడు.

ఆ తోట కాపలావాడు వెళ్లిన తరువాత కొంత సేపటికి ఇదంతా చెట్టు చాటుగా ఉండి చూస్తున్న తోడేలు తన స్నేహితుడిని అక్కడి నుండి తీసుకువెళ్ళటానికి వచ్చింది.

అప్పుడు ఆ తోడేలు ఆ గాడిదతో "మిత్రమా!! నా సలహా వినకుండా ఎంత పని చేశావు. నీ మంచి కోరి నేను చెప్తే వినలేదు నీకు మాలిన ధర్మం మొదలు చెడ్డ బేరం చేసుకున్నావు." అని అంది.

నిదానంగా తన మిత్రుడైన గాడిదని అడవిలోకి తీసుకుపోయింది.

అందుకే అన్నారు పెద్దలు "తనకు మాలిన ధర్మం మొదలు చెడ్డ బేరం."

అంటే ఎవరైనా తాను చేయలేని పని చేసి దానివలన వారికి చెడు జరిగితే ఆ సందర్భంలో ఈ సామెత ఉపయోగిస్తారు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Telugu Stories A Father's Lesson To His Son

Grandmas Stories presents you telugu stories

తండ్రి కొడుకుకి చెప్పిన గుణపాఠం

శ్రీపురంలో సోమశేఖరుడనే ధనిక వర్తకుడు ఉండేవాడు. అతను విదేశాలలో కూడా వర్తకం చేసేవాడు. ఊరిలో అతను దాన ధర్మాలు చేస్తాడని అడిగినవాళ్ళకి తగిన విధంగా సాయం చేస్తాడని మంచి పేరుంది.

సోమశేఖరుడికి ఒక్కగానొక్క కొడుకు, అతని పేరు శివశేఖరుడు. లేక లేక కలిగిన సంతానం అవటం వలన ఇంట్లో అంతా శివశేఖరున్ని ఎంతో గారాబంగా చూసుకునేవారు. ఆ ఇంట్లో శివశేఖరుడి ఎంతంటే అంత. అతను అడిగింది క్షణాల్లో అతని ముందు తెచ్చి పెట్టేవారు.

 దీంతో అతను బాగా సోమరిపోతులా, ఎందుకూ పనికిరానివాడిలా తయారయ్యాడు.

శివశేఖరుడు పెరిగి పెద్దవాడయ్యాడు. అయినా కానీ తండ్రి సోమశేఖరుడు చేసే వర్తకం ఏ మాత్రం రాలేదు. సోమశేఖరుడికి తాను పెద్దవాడయ్యాడు తన తరువాత తన కొడుకు వ్యాపారాన్ని చుస్కోలేడు అనే చింత బాధించసాగింది.

సోమశేఖరుడు ఎన్నో విధాలుగా తన కొడుకుని మార్చాలని ప్రయత్నించి విఫలమయ్యాడు. ఇక లాభంలేదనుకుని ఒక నిర్ణయానికి వచ్చాడు.

సోమశేఖరుడు తన కొడుకుతో "నాయన నేను మన ఉన్నిని విదేశాలలో అమ్మి వస్తాను. అప్పటిదాకా నీవు ఇక్కడి వ్యవహారాలు చూసుకో, ఏదైనా అవసరం వస్తే ఇక్కడ నా మిత్రులు నీకు సహాయం చేస్తారు." అని చెప్పి రష్యాకు ఓడలో బయలుదేరతాడు.

కొన్ని రోజుల తరువాత సోమశేఖరుడు వెళుతున్న నౌక ప్రమాదానికి గురైందని నౌకలోని అందరూ చనిపోయారని వార్త వచ్చింది.

శివశేఖరుడు ఇది విని ఎంతో బాధపడ్డాడు. కానీ అతనికి వ్యాపారం చేయటం రాదు. ఎలాగూ తన తండ్రి మిత్రులు ఉండనేఉన్నారు వారు తనకు ఎప్పటికీ సహాయం చేస్తూనే ఉంటారు అని అనుకుని నిశ్చింతగా ఉండసాగాడు.

కొన్ని రోజులకి తన తండ్రి మిత్రులందరూ ఒక్కొక్కరిగా సహాయం చేయటం మానేస్తారు. చివరికి ఎవ్వరు సహాయం చేయట్లేదని శివశేఖరుడు నిదానంగా వర్తక విద్యని నేర్చుకోవటం మొదలుపెడతాడు.

కొద్ది రోజులలోనే వ్యాపారంలోని కిటుకులన్నీ నేర్చుకుని తన తండ్రిలాగా విదేశీ వర్తకం చేసే స్థాయికి ఎదుగుతాడు.
శివశేఖరుడు తన తండ్రి ఆశించినదానికంటే ఎంతో చురుకుగా వ్యాపారం చేస్తుంటాడు. ఆతను కూడా తన త్నడ్రిలాగా వ్యాపారంలో, ఊరిలో మంచి పేరు తెచ్చుకుంటాడు.

ఇలా ఉండగా ఒక రోజు తన తండ్రి సోమశేఖరుడు ఇంటికి తిరిగి వస్తాడు. తండ్రిని చూసి శివశేఖరుడు ఎంతో ఆనందించి తన వ్యాపార ప్రతిభ గురించి, ఇంకా ఇన్ని రోజులు ఉరిలో తాను చేసిన మంచి పనుల గురించి అన్నీ తండ్రికి వివరంగా చెబుతాడు.

ఇవన్నీ విన్న సోమశేఖరుడు తన కొడుకు తననే మించిపోయాడు అని సంతోషించి ఇలా చెప్తాడు, "నాయన నేను లేకపోతేకానీ నీవు దారిలోకి రావని నేను ప్రయాణిస్తున్న నౌకకి ప్రమాదం జరిగిందని, అందులోని అందరూ చనిపోయారని నీతో చెప్పమన్నాను, నా మిత్రులతో కొన్ని రోజుల తరువాత నీకు సహాయం చేయటం మానేయమని చెప్పాను. అలా చేస్తే కానీ నీవు దారిలోకి రావని ఈ పని చేశాను."

ఇది విన్న కొడుకు శివశేఖరుడు ఎంతో ఆశ్చర్యపోయి "మరి మీరు ఇన్ని రోజులూ ఎక్కడ ఉన్నారు? ఏమి చేశారు?" అని అడిగాడు.

దానికి సోమశేఖరుడు నవ్వి "నేను నా ఆప్త మిత్రుని ఇంట్లో ఉంటూ నీ ఉన్నతిని గురించి నా మిత్రులద్వారా తెలుసుకుంటూ ఉన్నాను." అని అన్నాడు.

తన తండ్రి తన బాగు కోసం ఎంత శ్రమపడ్డాడు అని శివశేఖరుడు బాధపడి తన తండ్రికి క్షమాపణలు చెప్పి అలా చేసినందుకు తనని సరైన దారిలోకి నడిపినందుకు శివశేఖరుడు తన తండ్రి సోమశేఖరుడికి ధన్యవాదాలు చెప్పాడు.

అప్పటినుంచి శివశేఖరుడు తండ్రికి అన్ని విషయాలలో సహాయంగా ఉంటూ ఆనందంగా జీవించాడు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Grandma Telugu Stories From Proverbs

Grandmas Stories presents you telugu stories

పెద్దలమాట చద్దిమూట

శ్రావణపురంలో శరభయ్య అనే చేయి తిరిగిన రైతు ఉండేవాడు. అతను సేంద్రియ వ్యవసాయంలో అనేక పద్దతులతో అద్భుతమైన పంటలని పండిస్తూ ఉండేవాడు.

 అతని నాణ్యమైన పశు సంపద కూడా ఉండేది. ఇదంతా అతని కష్టార్జితం.

శరభయ్య ప్రతి రోజు తెల్లవారుఝామునే లేచి వ్యవసాయ పనులు మొదలు పెట్టి, పనివారికి పని పురమాయించి, వారు ఆ పని సరిగ్గా చేశారో లేదో చూసుకుని, ఇంకా ఏమి కొత్త పద్ధతులతో వ్యవసాయం చేస్తే పంట మరింత మెరుగుపడుతుంది అని కొత్త ప్రయోగాలు చేసి, ఇలా అన్ని పనులు పూర్తిచేసుకుని పొద్దుపోయిన తరువాత ఇంటికి చేరుకునేవాడు.

ఒక్క మాటలో శరభయ్యకి వ్యవసాయం అంటే పంచ ప్రాణాలు. అటువంటి శరభయ్యకి రమేష్,ఉమేష్ అనే ఇద్దరు కొడుకులు. పెద్ద కొడుకు రమేష్కి దేశ భక్తి ఎక్కువ, ఎప్పుడూ దేశం కోసం ఏమైనా చేయాలి, అందుకోసం సైన్యంలో చేరాలి అని అనుకునేవాడు. ఇంక రెండో కొడుకు ఉమేష్కి వ్యాపారం చేయటం అంటే ఇష్టం.

తన తరువాత తన పొలాన్ని, పశు సంపదని ఎవరు చూసుకుంటారు అని శరభయ్యకి ఒకటే చింతగా ఉండేది.

ఇక ఒకరోజు శరభయ్య పెద్ద కొడుకు రమేష్ని పిలిచి "నాయన నీవు భవిష్యత్తులో ఏమి చేయాలనుకుంటున్నావు?" అని అడిగాడు.

దానికి రమేష్ "నేను సైన్యంలో చేరి దేశానికి సేవ చేయాలనుకుంటున్నాను నాన్న" అని ఖచ్చితంగా చెప్పాడు.
శరభయ్య సరే అని చెప్పి పెద్ద కొడుకుని సైన్యంలోకి పంపాడు.
కొంత కాలం తరువాత శరభయ్య చిన్న కొడుకు ఉమేష్ని పిలిచి "నాయన, నీ అన్నయ్య సైన్యంలో చేరాడు, ఇక నాకు సాయంగా ఉండాల్సింది నీవే, నీకు ఇష్టమైన వ్యాపారం చేసుకుందువుకానీ అప్పటిదాకా నాకు వ్యవసాయంలో సాయం చెయ్యి." అని అడిగాడు.

ఉమేష్కి తన నాన్న చెప్పింది బాగానే అనిపించింది, అందువలన దానికి ఒప్పుకుని శరభయ్యకి వ్యవసాయంలో సాయంగా ఉంటూ వచ్చాడు.

కొంత కాలానికి శరభయ్య చనిపోయాడు. చనిపోతూ ఉమేష్తో "నాయన నా ఆస్తిని నీ అన్నయ్యతో సరి సమానంగా పంచుకో, పొలాన్ని, పశువుల్ని కన్న బిడ్డల్లా చూసుకో" అని చెప్పి చనిపోయాడు.

ఉమేష్ కొంత కాలం అన్నీ బాగానే చూసుకున్నాడు, తరువాత పట్నంలో వ్యాపారం పెట్టాలని పొలాన్ని, పశువుల్ని కౌలుకి చూసుకుంటానికి ఇచ్చేసి పట్నంలో కొత్త వ్యాపారం మొదలుపెట్టాడు.

మొదట్లో అంతా బాగానే ఉంది. కొంత కాలం గడిచేసరికి కౌలుకి ఇచ్చిన వాళ్ళు డబ్బు సరిగ్గా పంపటం మానేశారు. వ్యాపారంలో నష్టం వచ్చింది. ఇంక చేసేది లేక తిరిగి తన ఊరు శ్రావణపురానికి చేరుకున్నాడు.

అక్కడ తన పొలం కౌలుకి తీసుకున్నవాడు వాడిన ఎరువులూ, రసాయనాల వల్ల పంట ఎంతో క్షీణించి ఉంది. పశువులు పట్టించుకునేవాళ్ళు లేక అనారోగ్యంతో, బక్కచిక్కి ఉన్నాయి. అంటే ఇన్ని రోజులూ కౌలుకి తీసుకున్నవాడు తన తండ్రి పొలాన్ని, పశువులని సరిగ్గా చేసుకోలేదని అర్థమయ్యింది.

ఇక ఆలస్యం చేయకుండా తన తండ్రి కన్న బిడ్డలా చూసుకున్న తన పొలాన్ని, పశువులని తానే స్వయంగా సాగు చేయటం, బాగోగులు చూసుకోవటం మొదలుపెట్టాడు.
మళ్లీ శరభయ్య పొలానికి పూర్వ కళ వచ్చింది. తన తండ్రిలాగే సేంద్రియ సాగులో కొత్త పద్దతులతో రెట్టింపు పంట పండించసాగాడు.

ఇంతలో సైన్యంలో చేరిన ఉమేష్ అన్నయ్య రమేష్ తిరిగి ఇంటికి వచ్చాడు. ఉమేష్ తన తండ్రి ఆజ్ఞ ప్రకారం ఆస్తిని ఇద్దరికీ సమానంగా పంచాడు. 

అన్నదమ్ములిద్దరూ పెళ్లి చేసుకుని తమ కుటుంబాలతో పొలాన్ని, పశు సంపదని చక్కగా చూసుకుంటూ ఎంతో సంతోషంగా జీవించారు.

అందుకే అన్నారు పెద్దలు, "పెద్దలమాట చద్దిమూట" అని.

అంటే పెద్దవాళ్ళు చెప్పింది విని అది సరిగ్గా ఆచరిస్తే ఎంతో మేలు జరుగుతుందని ఈ సామెత అర్థం. పెద్దవాళ్ళు వాళ్ళ అనుభవాల నుంచి నేర్చుకుని పిల్లలకి మంచి చెబుతారు. అది విని ఆచరిస్తే తరువాతి తరాలవారికి మంచిదని అర్థం.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Telugu Moral Stories From Grandma

Grandma stories presents you  telugu stories 

మెరిసేదంతా బంగారం కాదు

అనగనగా ఒక పెద్ద అడవి ఉంది. ఆ అడవిలో పెద్ద చెరువుంది. ఆ చెరువులో బోలెడు చేపలు ఉండేవి. ఆ చేపలని తినటానికి ఒక కొంగ చాలా ప్రయత్నాలు చేసింది, ఐనా దానికి ఒక్క చేప కూడా చిక్కలేదు.

అప్పుడు ఆ దొంగ కొంగ ఏంతో ఆలోచించి ఒక పథకం పన్నింది.

ఆ కొంగ రోజు చెరువులో ఒంటికాలి మీద నిలుచుని జపం చేస్తున్నట్టుగా నటించేది. ఆ చెరులోని చేపలు కొన్ని రోజులు దూరంగా ఉండి ఈ కొంగ ఏమి చేస్తుందా అని ఆసక్తిగా గమనించసాగాయి.

ఇలా కొన్ని రోజులు గడిచాయి, ఆ దొంగ కొంగ తనపాటికి తాను కొంగ జపం చేస్తూ చేపల్ని పట్టించుకోకుండా ఉండేది.
కొన్ని రోజులకి ఆ చెరువులోని చేపలు ఆ కొంగ ఏమి చేస్తుందిలే, అది ఎప్పుడూ కొంగ జపం చేసుకుంటూ ఉంటోంది అని దాని దగ్గరగా తిరగటం మొదలుపెట్టాయి. ఐనా కొంగ పట్టించుకోకుండా దొంగ కొంగ జపం చేసుకుంటూ ఉంది.

మరికొన్ని రోజులకి ఆ చెరువులోని చేపలు ఆ కొంగతో మాట్లాడటం మొదలుపెట్టాయి. "ఓ మిత్రమా!! నీలో ఇంత మార్పు ఎలా వచ్చింది. మమ్మల్ని తినటం కూడా మానేసి నీవు జపం చేసుకుంటున్నావ్." అని అడిగాయి.

దానికి దొంగ కొంగ " మిత్రులారా!! నాకు ఒక ముని చెరువులో ఒంటికాలి మీద జపం చేస్తే ఆకలి దప్పికలు ఉండవని చెప్పాడు అందుకే నేను ఇలా జపం చేస్తున్నాను." అని అంది.

ఇది విన్న చేపలు, ఓహో ఈ కొంగ పూర్తిగా మారిపోయింది, ఇంక వాటిని ఈ కొంగ తినదు అని అనుకుని దాని దగ్గరగా భయంలేకుండా తిరగటం మొదలుపెట్టాయి.
ఇంక ఆ దొంగ కొంగ చేపలతో ఏంతో స్నేహంగా మాట్లాడటం మొదలుపెట్టింది.

సరైన అవకాశం కోసం చూస్తున్న ఈ దొంగ కొంగకి చేపలు తనని పూర్తిగా నమ్మి దాని దగ్గరే ఉండటంతో తన పథకంలో తరువాతి భాగానికి తేర తీసింది.

ఒక రోజు ఆ దొంగ కొంగ చేపలన్నీ దాని చుట్టూ ఆడుకుంటుండగా ఆ చేపలతో ఇలా అనసాగింది, "మిత్రులారా!! నా తపశ్శక్తితో ఒక విషయం చూశాను. త్వరలో ఈ చెరువు ఎండిపోబోతోంది మీరు ఇంకా ఇక్కడే ఉంటే చనిపోతారు. మీరు నా మిత్రులు కాబ్బట్టి ఈ విషయాన్ని మీతో చెప్తున్నాను." అని అంది.

ఈ విషయం విన్న చేపలు ఏంతో భయపడ్డాయి. అప్పుడు ఈ దొంగ కొంగ "సరే నేను చెప్పవలసిన విషయం చెప్పాను. ఇంక సెలవు మిత్రులారా!! ఈ చెరువుకి దగ్గరలో ఇంకొక పెద్ద చెరువు ఉంది, నేను అక్కడికి వెళిపోతున్నాను." అని అంది.

ఈ మాట విని ఈ చేపలు ఇంకా భయానికి లోనయ్యాయి. ఇదే అవకాశముగా భావించి ఆ కొంగ చేపలతో "మీకు అభ్యంతరం లేకపోతే నేను మిమ్మల్ని ఒక్కొక్కరిగా నా నోట్లో పెట్టుకుని ఆ చెరువులోకి తీసుకువెళతాను." అని అంది.

ఇది విన్న చేపలు కొంత సేపు ఆలోచించుకుని ఆ దొంగ కొంగని నమ్మి సరే అన్నాయి.

ఇంక ఒక్కొక్క చేపని తీసుకువెళ్లి దగ్గరలోని కొండ మీద తినేయటం మొదలుపెట్టింది.

ఇలా జరుగుతుండగా ఒక రోజు ఆ చెరువులోని ఒక ఎండ్రగబ్బ వంతు వచ్చింది. అన్ని చేపల్లాగే ఈ ఎండ్రగబ్బని కూడా ఆ దొంగ కొంగ తీసుకువెళ్ళసాగింది. ఆ దొంగ కొంగ తినే కొండ సమీపిస్తుండగా ఈ ఎండ్రగబ్బకి అక్కడ ఏ చెరువు కనిపించలేదు, పైగా కొంగ తినివేయగా మిగిలిన చేపల ఎముకలు కనిపించాయి.

దాంతో ఎండ్రగబ్బ తెలివిగా "మిత్రమా నాకు నీ నోటిలోంచి జారిపోతున్నట్టుగా అనిపిస్తోంది ఎక్కడైనా కొంచెం ఆపితే నీ మెడకు చుట్టూ చేతులు వేసి గట్టిగా పట్టుకుంటాను" అని అంది.

ఈ దొంగ కొంగ దాని ఆహారం కింద పడిపోతుందేమోనని ఎండ్రగబ్బని ఒకచోట దించి దాని మెడ చుట్టూ గట్టిగా పట్టుకోమని చెప్తుంది.

తెలివైన ఎండ్రగబ్బ ఇదే అవకాశం అనుకోని ఆ దొంగ కొంగ మెడ కొరికి దాన్ని చంపివేసింది.

ఆ ఎండ్రగబ్బ ఎంతో తెలివిగా, తనని, ఆ చెరువులోని మిగిలిన చేపలని కాపాడింది. అప్పుడు అది ఆ దొంగ కొంగని చూసి "మెరిసేదంతా బంగారం కాదు." అని అనుకుంది.

అందుకే అన్నారు పెద్దలు "మెరిసేదంతా బంగారం కాదు" అని

అంటే ఎవరైనా ఏంతో మంచిగా నటించి అవతలివాళ్ళని మోసం చేయబోతే ఈ సామెతని ఉపయోగిస్తారు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Telugu Stories For Everyone

Grandma stories presents you telugu stories

తేలుకుట్టిన దొంగ

పాండ్య దేశపు రాజు మాల్యవంతుడు. అతని మంత్రి పేరు బొమ్మరాయడు. ఒకసారి బొమ్మరాయుడు ఒక పని నిమిత్తం వేరే రాజ్యానికి వెళుతుండగా పూట కూళ్లమ్మ బసలో బాగా తెలివైన ఒక వ్యక్తి కనిపించాడు. 

బొమ్మరాయుడు అతన్ని దగ్గరికి పిలిచి అతని చేయి చూసి చాలా ఆశ్చర్యం చెందాడు. అతని హస్తరేఖల్లో పాండ్య దేశపు రాజుకి అల్లుడయ్యే అవకాశాలు కనిపించాయి. బొమ్మరాయుడు ఆలోచన ఏమిటంటే రాజు కుమార్తెను తన కొడుకుకి చేసుకుని రాజ్యాన్ని కైవసం చేసుకోవాలనే దురాలోచన ఉంది. ఈ వ్యక్తి చేతుల్లో రాజుకి అల్లుడయ్యే రేఖని చూసి అతన్ని చంపేయాలనుకున్నాడు.

బొమ్మరాయుడు ఒక లేఖపై ఇలా రాశాడు "ఈ లేఖ తెచ్చినవానికి విషము ఇమ్ము." అని ఆలా రాసి ఆ యువకుడిని పిలిచి "ఈ లెఖను నీవు తీసుకుని వెళ్లి రాజధాని నగరంలో ఉన్న నా కుమారుడికి ఇవ్వు నీకు మంచి జరుగుతుంది" అని చెప్పాడు.
మంత్రి వేరే పని మీద వెళ్ళిపోయాడు.

ఆ యువకుడు ఆ లేఖను జాగ్రత్తగా తన నడుము వస్త్రంలో దోపుకుని రాజధాని నగరానికి చేరుకొని అంతఃపురానికి దగ్గరగా ఉన్న తోటలో కాసేపు విశ్రాంతి తీసుకుందామని ఆగాడు. అలసట వలన ఆ యువకునికి నిద్ర పట్టింది.

 మంత్రి కుమార్తె పేరు విషయ. ఆమె అదే సమయంలో ఈ యువకుడు విశ్రాంతి తీసుకుంటున్న తోటలోకి వచ్చింది.
ఈ యువకుడి అందానికి దిగ్భ్రాంతి చెందింది విషయ. ఆమె అతని దగ్గరికి వెళ్లి అతని దగ్గర ఉన్న ఉత్తరాన్ని చూసింది. ఆ ఉత్తరాన్ని నిదానంగా బయటికి తీసి చదివింది. తన తండ్రి అతనిని ఎందుకు చంపమన్నాడో అర్థంకాలేదు.

 విషయ అతన్ని పెళ్లి చేసుకోవాలనే నిర్ణయానికి వచ్చింది. చెలికత్తెలతో విషయ ఆలోచించి ఆ లేఖలో "విషము" అనే పదాన్ని "విషయ" అనే పదంగా మార్చింది.

ఇప్పుడు ఆ లేఖలోని భావం ఏమిటంటే "ఈ లేఖ తెచ్చినవానికి విషయనిమ్ము."
విషయ ఆ లేఖను మరల అతని దగ్గర పెట్టేసి తన భవనానికి వెళ్ళిపోయింది.
ఆ యువకుడు ఆ లేఖను మంత్రి కుమారుడి చేతికి ఇచ్చాడు. మంత్రి కుమారుడు తన చెల్లెలికి అంత తొందరగా ఎందుకు వివాహం చేయాలి అని ఆశ్చర్యపోయాడు.

ఎంతైనా అతను మంత్రి కుమారుడు కదా, లేఖ తెచ్చిన యువకుణ్ణి "ఈ లేఖ ఇచ్చి మా నాన్నగారు నీకు ఇంకేమైనా చెప్పమన్నారా?"అని అడిగాడు.

ఆ యువకుడు "ఈ లేఖ ఇచ్చినందువల్ల నాకు మంచి జరుగుతుందని చెప్పామన్నారు." అని అన్నాడు.
వెంటనే మంత్రి కుమారుడు ఆ యువకునికి, తన చెల్లెలికి వివాహం జరిపించాడు.

వివాహ వేడుకలు జరుగుతుండగానే బొమ్మరాయుడు ఇంటికి తిరిగి వచ్చాడు. అక్కడ ఉన్న పరిస్థితులకి అతను ఆశ్చర్యపడి తన కొడుకుని వివరాలు అడిగాడు. "మీరు లేఖలో రాసినట్టుగా వారిద్దరికీ వివాహం జరిపించాను." అని మంత్రి కుమారుడు చెప్పాడు.

అది విన్న మంత్రి ఆ లేఖను ఒకసారి తీసుకురమ్మన్నాడు. ఆ లేఖలో తాను "విషము" అని రాసినదాన్ని "విషయ"గా మార్చబడి ఉన్నది.

ఆ తరువాత బొమ్మరాయుడు "తేలుకుట్టిన దొంగలాగా" నిశ్శబ్దముగా ఉన్నాడు.

కొద్ది రోజులలోనే రాజు మాల్యవంతుడు ఆ యువకుడి తెలివితేటలను గుర్తించి తన కూతురుని ఆ యువకునికిచ్చి వివాహం చేశాడు.

ఈ విధంగా మాల్యవంతుడి తరువాత ఈ యువకుడు రాజయ్యాడు, మంత్రి కుమారుడు మంత్రి అయ్యాడు.
అందుకనే అదృష్టవంతుల్ని ఎవరూ చెరపలేరు అని అంటారు.

అందుకే అన్నారు పెద్దలు "తేలుకుట్టిన దొంగ" అని.

అంటే ఎవరైనా ఏదైనా తప్పు చేసి ఆ తప్పు వలన వారికే బాధకలిగినా దానిని బయటపెట్టకుండా దాచి ఉంచితే ఈ సామెతని ఉపయోగిస్తారు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Must Read Telugu Tales And Telugu Stories

Grandma stories presents you telugu stories

నిజమైన దానశీలి

ఉజ్జయిని నగరంలో ఒక శివాలయం ఉంది. అక్కడ నిత్య పూజలు, హోమాలు బాగా జరుగుతాయని మంచి పేరుంది. అది ఏంతో మహిమగల గుడి అని అందరూ అంటారు.

ఆ గుడి పూజారి ఏంతో నియమ నిష్ఠలతో పూజ చేస్తాడు. ఒక రోజు ఆ గుడి పూజారి పూజ ముగించుకుని ఇంటికి వెళుతుండగా ఆకాశంలోంచి పెద్ద శబ్దంతో మెరుపు మెరిసింది.

అది ఏమిటా అని పూజారి కళ్ళు నులుముకుని ఆకాశంకేసి చూశాడు. ఏంతో ధగద్ధగ్గాయమైన వెలుగులతో ఒక తొమ్మిది చదరపు గజాలు ఉండే బంగారు పళ్లెం అతని కళ్ళ ముందు ప్రత్యక్షం అయ్యింది.

అప్పుడు ఆ పూజారి శివనామస్మరణ చేస్తూ దాని దగ్గరికి వెళ్లి చూశాడు.

దానిపై ఇలా రాసి ఉంది, " ఎవరైతే నిస్వార్థ చింతనతో దాన ధర్మాలు చేస్తారో వారికే ఈ పళ్లెం చెందుతుంది. అర్హత ఉన్నవారు ముట్టుకుంటేనే ఈ పళ్ళెము బంగారు పళ్లెంగా ఉంటుంది, లేకపోతే రాయిగా మారిపోతుంది. లోకాస్సమస్తా సుఖినోభవంతు."

ఇక ఆ రోజు నుంచి పూజారి దానికి అర్హత ఉన్నవాడికోసం వెతకటం ప్రారంభించాడు.

ఈ వార్త క్షణంలో ఆ చుట్టు పక్కల ఊళ్లలో కూడా వ్యాపించింది. ఇంక ఆ బంగారు పళ్ళాన్ని పొందటానికి దూర దూరాలనుంచి జమీందారులు, దాన ధర్మాలు చేసేవారు, దురాశపరులు, ఎంతో మంది వచ్చి ఆ బంగారు పళ్ళాన్ని ముట్టుకోవటం అది రాయిగా మారితే నిరాశగా వెనుదిరగటం జరుగుతోంది.

ఇలా కొన్ని రోజులు గడిచింది. ఈ వింత ఏమిటా అని పూజారి ఆలోచించాడు. అప్పుడు అర్థమైంది పూజారికి "ఓహో! ఇది ఎక్కడో ఉండే వారికి చెందినదైతే ఇక్కడ ఎందుకు ప్రత్యక్షం అవుతుంది. అంటే ఆ నిస్వార్థ దానశీలి ఇక్కడే ఎక్కడో ఉంది ఉంటాడు" అని అనుకున్నాడు.
సరే ఇంక ఆ నిస్వార్థ దానశీలిని వెతికే బాధ్యత తానే స్వయంగా తలకెత్తుకున్నాడు.

ఉజ్జయినీలోనే ప్రతాపుడనే ఒక శ్రామికుడున్నాడు. అతను శ్రామికుడే ఐనా తనకు ఉన్న దానిలోనే ఇతరులకి సాయం చేస్తూ జీవిస్తున్నాడు. ఒక రోజు అతను గుడి దగ్గర ఉన్న బీద బిక్కితో మాట్లాడుతుంటే పూజారి చూసి అతనితో "ఎవరు నాయనా నువ్వు? నువ్వు క్రమం తప్పకుండ ప్రతి వారం ఇక్కడ బీద బిక్కీకి సాయం చేయటం చూస్తున్నాను." అని అడుగుతాడు.

అప్పుడు ప్రతాపుడు "నేను ఒక శ్రామికుడని, నాకు ఉన్నదానిలోనే నాకన్నా లేనివారికి ఏంతో కొంత సాయం చేస్తుంటాను." అని చెప్తాడు.

ఇంక పూజారికి అర్థమయ్యింది ఈ ప్రతాపుడే ఆ నిస్వార్థ దానశీలి అని. అప్పుడు ప్రతాపుడితో పూజారి బంగారు పళ్లెం విషయం అంతా చెప్పి వచ్చి దానిని ముట్టుకోమంటాడు.
అప్పుడు ప్రతాపుడు ఏంతో వినయంగా "అయ్యా!! నేను అంతటి గొప్పదానికి అర్హుడనని మీరు అనుకుంటే ధన్యవాదాలు. కానీ నేను దానిని ఆశించట్లేదు. మీరు ఇంతగా చెప్తున్నారు కాబట్టి వచ్చి ప్రయత్నిస్తాను." అని అంటాడు.

వెంటనే పూజారి ప్రతాపుడిని ఆ బంగారు పళ్లెం దగ్గరికి తీసుకెడతాడు.

ఇంకేముంది అందరూ చూస్తుండగానే ప్రతాపుడు ఆ పళ్ళాన్ని తన చేతులలోకి తీసుకోవటం ఆ బంగారు పళ్లెం బంగారంగానే ఉండటం జరిగిపొయినింది.

ఇంక పూజారి తనకు ఆ ఈశ్వరుడిచ్చిన బాధ్యతను సక్రమంగా పూర్తిచేసినందుకు, ఆ బంగారు పళ్లెం నిజమైన నిస్వార్థ దానశీలికి చెందటంతో ఏంతో ఆనందపడ్డాడు.

ప్రతాపుడు ఆ బంగారు పళ్ళాన్ని చక్కగా విధి విధానాలతో పూజిస్తూ దాని ద్వారా వచ్చిన సిరి సంపదల్ని చక్కగా దాన ధర్మాలు చేస్తూ గొప్ప దానశీలిగా పేరుతెచ్చుకున్నాడు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Grandma Stories Telugu Story

 Grandma stories presents you telugu stories

గుమ్మడికాయ దొంగ ఎవరు అంటే భుజాలు తడుముకున్నట్టు

అవంతీ నగర రాజ్యం విశాలమైనదని, మనోహరమైనదని పొరుగు రాజ్యాల్లో బాగా పేరుంది. ఆ రాజ్యాన్ని పాలించే రాజు మహేంద్రవర్మ ప్రజలని తన బిడ్డల్లా చూసుకుంటాడని అందరూ అనుకుంటారు. 

ఒకసారి రాజు మహేంద్రవర్మ అంతఃపురంలో వజ్ర వైడూర్యాలు, రత్నాలతో పొదిగిన ఒక బంగారు నగ దొంగతనం జరిగింది.
"అరెరే!! ఏంతో సుభిక్షమైన శాంతి సామరస్యాలతో ఉండే నా రాజ్యంలో ఇంత పని ఎవరు చేశారు!" అని చాలా బాధపడ్డాడు మహేంద్రవర్మ.
వెంటనే రాజు తన మంత్రి సులోచనుడిని పిలిచి విషయం వివరించి ఆ నగ దొరికేటట్టుగా చర్యలు చేపట్టమని మంత్రిగారిని రాజు ఆదేశించాడు. 

మంత్రిగారు బాగా ఆలోచించి ఎవరు లోపలికి రాలేని అంతఃపురంలో దొంగతనం జరిగిందంటే పనివాళ్లే చేసుంటారని మంత్రి భావించాడు.

ఆ మరునాటి ఉదయం పనివాళ్ళందరూ రాగానే మంత్రి వాళ్లందరికీ నాలుగు అంగుళాల చీపిరి పుల్ల ఇచ్చాడు.

మంత్రి ఈ విధంగా చెప్పాడు, "ఈ చీపురు పుల్లని మీరు ఒక్కొకటి తీసుకుని ఆ గదిలో పెట్టి రావాలి. ఎవరైతే దొంగతనం చేశారో వారి చీపురు పుల్ల ఒక అంగుళం పెరుగుతుంది."

పనివాళ్ళందరూ ఆ విధంగా చీపురు పుల్లని లోపల పెట్టారు. నిజంగా దొంగతనం చేసిన పనివాడు చీపురుపుల్లని ఒక అంగుళం ముక్క తుంచి లోపల పెట్టాడు. అందరి ముక్కలు నాలుగు అంగుళాలు ఉంటే దొంగతనం చేసినవాడు చీపురు పుల్ల మూడు అంగుళాలు ఉంది.

ఈ విధంగా దొంగ బయటపడ్డాడు.

రాజు మంత్రిని అభినందించాడు.

అందుకే అన్నారు పెద్దలు " గుమ్మడికాయ దొంగ ఎవరు అంటే భుజాలు తడుముకున్నట్టు."

అంటే ఎవరైనా ఒక విషయం చెప్పినప్పుడు ఆ విషయాన్ని తనకి అన్వయించుకోవటాన్ని ఈ సామెత రూపంలో చెప్పారు.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀