Telugu Stories A Must Read Story

 

నోరు మంచిదైతే ఊరు మంచిదవుతుంది

సీతపారంలో అమృత అనే ఒకావిడ ఉంది. ఆవిడ ఒక మధ్యతరగతి గృహిణి, ఐనప్పటికీ అందరిదగ్గర బాగా గొప్పలు పోతూ ఉంటుంది. ఆమె భర్త ఎంత చెప్పిన ఆ అలవాటు మానుకోదు. ఇది కాక ఎవరింటికి వెళ్లినా వాళ్ళ ఇంటికో, వాళ్ళ జీవన విధానంలోనో లేకపోతతే ఇంకేదైనా విషయంలోనో ఏదో ఒక వంక పెట్టడం ఆవిడకి బాగా అలవాటు.

పెళ్ళికి పేరంటానికి బంధువులకి, తెలిసిన వాళ్లకి, ఆమెను పిలవక తప్పదాయె. ఇంక ఎదోఒకటిలే అని కొంతమంది, ఆమె భర్త మొహం చూసి కొంతమంది పిలిచేవారు.

ఇదిలా ఉండగా ఒకసారి అమృత తన కొడుకు పుట్టిన రోజు జరపాలనుకుంది. భర్త తాహతుకి మించి ఆలోచిస్తుంది అమృత. కాదంటే ఎక్కడ భార్య బాధపడుతుందో అని ఒప్పుకుంటాడు అమృత భర్త.

ఇంక అమృత ఆనందానికి అంతులేదు. తెలిసినవారందరినీ పేరు పేరున పిలిచింది అమృత.

పుట్టిన రోజు రానే వచ్చింది పిలిచిన ప్రతి ఒక్కరు వచ్చారు. అమృత ఒక్కొక్కళ్ళని పలకరించడం మొదలు పెట్టింది.
ఇన్ని రోజులు అనిపించుకున్న వారికి అమృతని అనటానికి మంచి అవకాశం దొరికింది.

ఇంకేముంది ఒకళ్ళు అమృత ఇంటి గురించి అవహేళన చేస్తే, ఇంకొకళ్ళు ఆమె చేసిన ఏర్పాట్ల గురించి, ఇంకొకరు ఆమె భర్త ఆదాయం గురించి, ఇలా అందరు తలో మాట అని వెళ్లారు.

అప్పటి దాకా ఏడుపు పంటి బిగువున పెట్టుకుని ఉన్న అమృత అందరూ వెళ్ళిపోయిన వెంటనే భర్త దగ్గర కూర్చుని ఏడుస్తూ జరిగిందంతా చెప్పింది.

అప్పుడు అమృత భర్త "నోరు మంచిదైతే ఊరు మంచిదవుతుంది." అని అన్నాడు.

కనువిప్పు కలిగిన అమృత ఆ తరువాత ఎప్పుడు ఎవరిని ఎత్తిపొడవటం కానీ, అనవసరంగా చులకన చేసి మాట్లాడటం కానీ చేయలేదు.

అమృతలో వచ్చిన ఈ మార్పుకి అందరు ఏంతో సంతోషించారు.

అందుకే అన్నారు పెద్దలు "నోరు మంచిదైతే ఊరు మంచిదవుతుంది." అని.

అంటే ఎవరైనా ఎప్పుడు అందరితో మంచిగా మాట్లాడాలి, మెలగాలి అని అప్పుడే అవతలివారి నుంచి మనకి తిరిగి గౌరవం లభిస్తుంది అని ఈ సామెత రూపంలో చెప్పారు.

ఈ సామెత కథ మీ అందరూ చదివి సందర్భానుసారం ఉపయోగించండి అప్పుడే తెలుగు భాష వర్ధిల్లుతుంది.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Telugu Stories The Kindness Of Sri Rama

Grandmas stories presents you Telugu Stories

శ్రీ రాముని ఔదార్యం 

శ్రీ రాముడు గొప్పవాడనటానికి చాలా నిదర్శనాలు రామాయణంలో వాల్మీకి చూపించాడు.
ఇప్పుడు చెప్పే విషయం కూడా ఆ గొప్పతనాల్లో ఒకటి.
కైకేయి వరాల మేరకు శ్రీ రాముడు పట్టాభిషేకం మానుకుని అరణ్య వాసానికి బయలుదేరుతున్న నేపథ్యంలో ఒక వృద్ధ బ్రాహ్మణుడు శ్రీ రాముడిని చూడటానికి వచ్చాడు. వెంటనే శ్రీ రాముడు తాను చేస్తున్న పని ఆపి వృద్ధ బ్రాహ్మణుడి దగ్గరికి వచ్చాడు.
శ్రీ రాముడు వృద్ధ బ్రాహ్మణుడికి నమస్కరించి తన నుంచి కావలసినటువంటి సహాయం అడగమన్నాడు.
అందుకు వృద్ధ బ్రాహ్మణుడు శ్రీ రాముడితో "రామా నిన్ను చూద్దామని వచ్చాను ఇప్పుడు నిన్ను చుసిన తరువాత నిన్ను ఒకసారి దగ్గరికి తీసుకోవాలనిపిస్తుంది." అని ఆన్నాడు.
వెంటనే శ్రీ రాముడు వృద్ధ బ్రాహ్మణుణ్ణి దగ్గరికి తీసుకున్నాడు. ఆ తరువాత వృద్ధ బ్రాహ్మణుడు యవ్వనవంతుడయ్యాడు.

 

బ్రాహ్మణుణ్ణి ఏమైనా కోరిక కోరుకోమని శ్రీ రాముడు అడిగాడు. అందుకు బ్రాహ్మణుడు ఏమి వద్దన్నాడు.
తరువాత శ్రీ రాముడు ఇక్కడ ఉన్న ఈ కర్రని విసిరేస్తున్నాను ఇది ఎక్కడికెళ్ళిపడుతుందో అక్కడి దాక సంపదలన్నీ నీవే అని అన్నాడు.
ఆ కర్ర అన్ని చోట్ల తిరిగి శ్రీ రాముడి వద్దకే తిరిగి చేరింది.
శ్రీ రాముడు ఆ బ్రాహ్మణునికి తరతరాలకు సరిపోయేటంత సంపదిచ్చి పంపించాడు.
ఈ విషయంలో మనం తెలుసోకవలసిన నీతి ఏమిటంటే మహారాజుగా జరగవలసిన పట్టాభిషేకం శ్రీ రాముడికి ఆగిపోయి సకల కష్టాలతో కూడుకున్నటువంటి అరణ్యవ్యాసానికి వెళుతున్న నేపథ్యంలో బ్రాహ్మణుడు వచ్చి అడిగిన దానికి ఏమాత్రం విసుగు కోపం లేకుండా రాముడు అతన్ని ఎంతో గౌరవించి పంపించాడు.
అప్పటినుండి ఇప్పటికి కూడా రామరాజ్యం అనే పేరు మారు మోగుతుంది.

శ్రీ రామ జయ రామ జయ జయ రామ.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Telugu Stories : The Great King Vikramarka

Grandmas stories presents you telugu stories.

రంభా!! ఊర్వశా!! : ఇద్దరిలో ఎవరు గొప్ప నాట్యగత్తె!!

దేవతల రాజు దేవేంద్రుడు దేవేంద్రుని కొలువులో రంభ మరియు ఊర్వశి అని పేరుకలిగిన వాళ్ళు నృత్యం చేసేవారు.

చాలా కాలం గడిచిన తరువాత రంభ ఊర్వశి మధ్య పోటీ వచ్చింది.

వారిరువురిలో ఎవరు బాగా నృత్యం చేస్తారనే సమస్య వచ్చింది.

అప్పుడు దేవేంద్రుడు నాట్య శాస్త్రంలోని అన్ని పద్దతుల్లోనూ వారిద్దరి చేత నృత్యం చేయించాడు.
కానీ ఈ ఇద్దరిలో ఎవరు గొప్ప అని తేల్చలేకపోయారు. అదే సమయంలో నారదుడి వచ్చాడు.

ఏమిటి దేవేంద్ర ఏమి ఆలోచిస్తున్నావని నారదుడు దేవేంద్రదుని ప్రశ్నించాడు.

అప్పుడు దేవేంద్రుడు వీరిద్దరిలో ఎవరు గొప్ప నాట్యగత్తె అని నేను తేల్చలేకపోతున్నాను అన్నాడు.

నారదుడు చిన్నగా నవ్వి ఇదేమి పెద్ద సమస్య ఏమి కాదు భలోకంలో విక్రమార్క మహారాజు ఉన్నాడు, అతను అరవై నాలుగు కళలోను దిట్ట.

అతన్ని నీవు ఆహ్వానిస్తే క్షణాల్లో నీ సమస్యని తీర్చేస్తాడు. అప్పుడు దేవేంద్రుడు తన సారథి మాతలికి తన రథం ఇచ్చి భూలోక ప్రభువైనటువంటి విక్రమార్కుడిని సగౌరవంగా తీసుకురమ్మని పంపించాడు.

ఈ ఆహ్వనం విన్న వెంటనే విక్రమార్కుడు ముందు ఆశ్చర్యపడి ఆ తరువాత భట్టికి తనం కార్యక్రమాలన్నీ అప్పచేప్పి విక్రమార్కుడు ఇంద్ర సభకి వచ్చాడు
ఇంద్రుడు విక్రమార్కుడిని సగౌరవంగా ఆహ్వానించి ఒక ఆసనం మీద కూర్చోబెట్టాడు.

అప్పుడు దేవేంద్రుడు విక్రమార్కుడితో "రంభా ఉర్వశిలలో ఎవరు గొప్ప నాట్యకత్తె అనేది నేను తేల్చలేకపోయాను. నారదుడి సలహా మీద మిమ్మల్ని నేను ఆహ్వానించాను. మీరు ఈ సమస్యని పరిరిష్కరించవలసిందిగా నేను కోరుతున్నాను." అన్నాడు.

అప్పుడు విక్రమార్కుడు "దేవేంద్రా! రంభ ఊర్వశి ఇద్దరితో నాట్యం చేయించండి" అని చెప్పాడు.

రంభ ఊర్వశి ఇద్దరు ఇంద్ర సభకు వచ్చారు, విక్రమార్కుడు రెండు పూల మాలలను తెప్పించి రంభని ఉర్వశిని ఇద్దరినీ ధరించమన్నాడు. ఇద్దరు ధరించి నాట్యం మొదలువుపెట్టారు.

నాట్య శాస్త్రంలోని అన్ని రకాలుగాను ఇద్దరు నాట్యం చేశారు.

ఇద్దరి నాట్యం పూర్తైన తరువాత విక్రమార్కుడు ఈ విధంగా చెప్పాడు.

"రంభ ఊర్వశి ఇద్దరు నాట్య శాస్త్రంలోని అన్ని విషయాల్లోనూ సమానులే హావ భావ ప్రకటనలలో కూడా ఇద్దరు సమానులే, రంభ మెడలోని దండ యథాతథంగా ఉంది. కానీ ఊర్వశి మెడలోని దండ నలిగిపోయింది.
దీనికి కారణం ఊర్వశి ఎదో విధంగా రంభని ఓడించాలనుకుంది.

ఊర్వశి యొక్క ఈ మానసిక సంక్షోభం వలన ఆమె మెడలోని దండ నలిగిపోయింది."

"కానీ రంభ తన శాస్త్రాధ్యయనాన్ని కేవలం నాట్యం చేయటానికి మాత్రమే ఉపయోగించింది."

"ఆమెలో ఎటువంటి భావాలు లేవు. అందికనే ఆమె మెడలోని దండ నలిగిపోలేదు."

"కాబట్టి ఇద్దరిలోను రంభ గొప్ప నాట్యగత్తె" అని చెప్పాడు.
విక్రమార్కుడు చెప్పిన సమాధానానికి ఊర్వశి కూడా ఒప్పుకుంది.

దేవేంద్రుడు విక్రమార్కుడిని సన్మానించి సగౌరవంగా విక్రమార్కుడి రాజ్యానికి పంపించాడు.

Meet you all soon with another interesting Telugu sameta story.

we try to post as many Telugu stories as we can

Read, listen and enjoy from Grandmas Stories 😀👍

The Tale Of Little Lalita: One Nice trick Up The Sleeve:Telugu Samethalu Telugu Kathalu Grandma Stories

  Grandmas Stories Presents You Telugu Stories

నీవు నేర్పిన విద్యే నీరజాక్షా

బరంపురంలో లలిత అనే ఏంతో తెలివైన అమ్మాయి ఉండేది. ఆ ఊరిలో వాళ్లందురు ఆమె తెలివికి ముచ్చట పడుతుండేవారు.

ఒకసారి వాళ్ల దూరపు బంధువు చుట్టపు చూపుకని లలితవాళ్ళింటికి వస్తాడు. అతను లలితకి బాబాయి వరస అవుతాడు.

సరే ఊరు చూపించమని వాళ్ళ నాన్న చెప్పటంతో ఒకరోజు పొద్దునే తయారయ్యి ఊరు చూడటానికి బయలుదేరతారు ఇద్దరు .

ఆ ఉరిలో చూడదగ్గ ప్రదేశాలు ఒక్కొక్కటి చూపిస్తుంది లలిత, ప్రతిదానికి బాబాయి ఎదో ఒక వంక పెడుతున్నాడు.
లలిత బాబాయిని ఆ ఊరిలో పెద్ద పార్కుకి తీసుకువెళ్ళింది అది చూసి బాబాయి,"ఆ సరేలే! ఇదేనా మా ఊరిలో ఇంతకంటే పెద్ద పార్కు ఉంది అన్నాడు." ఆహా! అని ఊరుకుంది లలిత.

లలిత వాళ్ళ ఊరిలోని చాలా ప్రదేశాలు చూపించింది. బాబాయి ఏ ఒక్కదాన్ని వదలకుండా ఎదో ఒక పుల్ల మాట ఆంటూనే ఉన్నాడు, ప్రతిదానికి వంక పెట్టాడు.

సరే ఇలా కాదని లలిత తరువాత రోజు పొద్దునే, బాబాయి టిఫినుకి కుర్చునేసరికి అక్కడికి వచ్చింది.
ఆ రోజు టిఫిను లలితే చేసింది. బాబాయికి టిఫిన్ వడ్డిస్తూ, "ఇది ఇడ్లీ అంటారు. మా ఊళ్ళో ఇది తెల్లగా ఉంటుంది బాబాయ్" అంది.

ఇంకా "ఏమోలే! మా చిన్న ఊరిలో ఇడ్లీలు మీ పెద్ద ఊరిలో ఇడ్లిలలా ఎమైనా ఎరుపు రంగులో ఉండి, గారే రుచిలో ఉంటాయా! ఏమిటి!" అంది.

వెంటనే బాబాయి "అదేమిటి తల్లి అలా అన్నావు ఇడ్లీ ఎక్కడైనా ఇడ్లీలానే ఉంటాయి. తెల్లగా మంచి మినప పప్పు రుచిలో అంతేగాని ఇడ్లీ గారేలా ఎందుకుంటాయి?" అన్నాడు.

తరువాత బాబాయి అలా పొలంలోకి వెళ్లి వద్దామనుకుంటుంటే లలిత కూడా వస్తానని బయలుదేరింది.

దారిలో కొబ్బరిబోండాలవాడు కాయలు కొడుతుంటే "రెండు కాయలు ఇవ్వు" అని తీసుకుని బాబాయి దగ్గరికి వెళ్ళింది లలిత.
"ఇదిగో బాబాయ్ మా ఉరి కొబ్బరిబోండం" అని ఇచ్చింది.
ఇచ్చి ఇలా అన సాగింది, "అబ్బా! మా ఉరి కొబ్బరిబోండం నీళ్లు ఎంత బాగున్నాయో తియ్యగా."

ఇంకా "ఏమోలే మీ ఊరిలో బోండంలో నీళ్లు ఉంటాయో, లేకపోతె దానికి మించి ఇంకేమన్నా ఉంటాయో, లోపల కొబ్బరి బదులు ఇంకేమన్నా అరిసెలు! బూరెలు! ఉంటాయేమో" అంది.

"ఇదేంటమ్మా లలిత ఎక్కడైనా కొబ్బరిబోండంలో నీళ్లు, కొబ్బరి కాకపొతే ఇంకేమి ఉంటాయి?" అన్నాడు బాబాయి.

ఆ రోజంతా లలిత ప్రతి విషయానికి ఇలానే అంటూ ఉంది. సాయంత్రం తిరిగి ఇంటికి వచ్చేసరికి బాబాయి "అమ్మ లలితా నీవు పొద్దుట నుంచి ఇలా ఎందుకు మాట్లాడుతున్నావు?" అని అడిగాడు.

"అయ్యయ్యో!! బాబాయ్ మీ ఊరిలో మాట్లాడటం కుడా వేరేగా ఉంటుందా!!" అని అడిగేసరికి బాబాయికి విషయం అర్థమైంది.

అప్పుడు బాబాయికి "ఇప్పుడు అర్థం అయ్యింది తల్లి నాకు విషయం.నా మాటలు నాకే బాగా ఒప్పచెప్పావు, మీ ఉరి గొప్ప మీది మా ఉరి గొప్ప మాది. ఒకదానితో వేరొకదాన్ని పోల్చి కించపరచకూడదని నా పద్ధతిలోనే మాట్లాడి నాకు బాగా అర్థమయ్యేలాగా చేశావు, గడుగ్గాయి!" అని లలితను మెచుకున్నాడు బాబాయి .

అప్పుడు తెలివైన లలిత "నీవు నేర్పిన విద్యే నీరజాక్షా!! " అని నవ్వుతూ అంది.

అందుకే అన్నారు పెద్దలు నీవు నేర్పిన విద్యే నీరజాక్షా అని.

అంటే ఎవరికైనా వారి పద్దతిలోనే సమాధానం చెప్పినప్పుడు ఈ సామెతని ఉపయోగిస్తారు.

ఈ సామెత కథ మీ అందరూ చదివి సందర్భానుసారం ఉపయోగించండి అప్పుడే తెలుగు భాష వర్ధిల్లుతుంది.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Generosity of Sri Ramanujacharya: Sri Ranganatha Temple Telugu Moral Stories

Grandma stories presents you telugu stories

పశ్చాత్తాపాన్ని మించిన ప్రాయిశ్చిత్తములేదు

అవి శ్రీ రామానుజాచార్యులవారు శ్రీ రంగ క్షేత్ర నిర్వహణ బాధ్యత స్వీకరించిన రోజులు. అప్పటికే అక్కడి అర్చకులలో అవినీతి బాగా పెరిగిపోయి ఉంది.

శ్రీ రామానుజాచార్యులవారు ఎవరి అవినీతిని సహించేవారు కారు. దాంతో కోపం వచ్చిన అర్చకులు శ్రీ రామానుజాచార్యులని విషం పెట్టి చంపాలనుకుంటారు.
కానీ వాళ్లు స్వయంగా ఆ పని చేస్తే అనుమానం వస్తుందని ఒక స్త్రీ దగ్గరికి వెళ్లి ఆమెని శ్రీ రామానుజాచార్యులవారికి విషం కలిపిన భోజనం పెట్టమని అడుగుతారు.
ఆమె ముందు దానికి అంగీకరించదు, కానీ అవినీతి అర్చకులు ఆమెను బెదిరించి ఒప్పిస్తారు.

సరే అనుకున్నట్టే ఆ స్త్రీ భక్తురాలినంటూ శ్రీ రామానుజాచార్యుల దర్శనార్థం వచ్చిందని చెప్పి శ్రీ రామానుజాచార్యుల వద్దకు వెళ్లి, "భోజనం పెడతాను స్వామి! మీరు ఈ భక్తురాలికి ఆ సేవా భాగ్యం కలిగించండి" అని అడుగుతుంది.

ఆమె ఆంత భక్తితో అడిగేసరికి శ్రీ రామానుజాచార్యులవారు సరే అన్నారు.

ఆ స్త్రీ ఒక మాతృమూర్తి! అసలే సంశయిస్తున్న ఆమెకి ఆ విషం కలిపిన భోజనం వడ్డించేటప్పుడు శ్రీ రామానుజాచార్యులలో తన బిడ్డలు కనిపించారు.

ఇంక ఆమె తట్టుకోలేకపోయింది, వెంటనే శ్రీరామానుజాచార్యులవారి పాదాలపై పడి వెక్కి వెక్కి ఏడుస్తూ, "అయ్యా! తప్పైపోయింది మీరు ఈ భోజనం తినవద్దు. ఇందులో విషం కలపబడింది. తనకు ఇష్టం లేకపోయినా అవినీతి అర్చకులు తనను బెదిరించి తనతో ఈ పని చేయించారు. నా తప్పుని క్షమించండి" అని శ్రీరామానుజాచార్యులవారిని వేడుకుంది.

దయార్థహృదయులైన శ్రీ రామానుజాచార్యులవారు వెంటనే ఆమెని పైకి లేపి అమ్మా! ఇందులో నీ తప్పు ఏమి లేదని ఆమెని ఓదార్చి, ఆమె చేత ఈ పని చేయించాలని చూసిన ఆ అవినీతి అర్చకులని పిలిపించి "అయ్యో!! మీరు నా మీద ద్వేషంతో ఈ తల్లి చేత ఎంత పాపం చేయించబోయారు నాయనా !! ముందు ఆ తల్లి పాదాలపై పడి క్షమాపణ వేసుకోండి." అని అన్నారు.

అప్పుడు బుద్ధి వచ్చిన ఆ అవినీతి అర్చకులు ఆ తల్లిని తమ తప్పుకి క్షమించమని వేడుకుని ఇంకెప్పుడూ ఇటువంటి పని చేయము ఇంక నుంచి నీతిగా ఉంటాము అని శ్రీ రామానుజాచార్యులవారికి మాట ఇస్తారు. 

ఆ అర్చకుల పాశాత్తపాన్ని చూసిన శ్రీరామానుజాచార్యులవారు వాళ్ళని క్షమించి వదిలేశారు.

అందుకే అన్నారు పెద్దలు, "పశ్చాత్తాపాన్ని మించిన ప్రాయిశ్చిత్తములేదు" అని.

అంటే ఎవరైనా తమ తప్పు తెలుసుకుని దానిని సరిదిద్దుకునే ప్రయత్నం చేస్తే ఆ సందర్భంలో ఈ సామెతని ఉపయోగిస్తారు.

అందుకే అన్నారు పెద్దలు," ఎవరు తీసిన గోతిలో వారే పడతారు" అని.

అంటే ఎవరైనా ఎవరికైనా అపకారం తలపెట్టాలనుకుంటే అది వారికే జరిగినప్పుడు ఈ సామెతను ఉపయోగిస్తారు.

ఈ సామెత కథ మీ అందరూ చదివి సందర్భానుసారం ఉపయోగించండి అప్పుడే తెలుగు భాష వర్ధిల్లుతుంది.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

 

Do You Know How A Clever Judge Saved The Day: Justice Served Must Read Telugu Stories Justice

Grandmas stories presents you telugu stories

ఎవరు తీసిన గోతిలో వారే పడతారు

ఒక ఊరిలో రఘుపతి, కులపతి అనేవారు ఉండేవారు. రఘుపతి బాగా డబ్బున్నవాడు, డబ్బు కోసం గడ్డి తినేవాడు. కులపతికి అంతగా డబ్బు లేకపోయినా తనకున్న దాంతో సంతృప్తిగా ఉంటూ, ఎవరికైనా తనకు చేతనైనంత సాయం చేస్తూ ఉండేవాడు.

అందువలన కులపతికి ఊరిలో మంచి పేరుంది. రఘుపతికి ఇది కంటగింపుగా ఉండేది.

చదువుకుని అక్షర జ్ఞానం ఉండటం వలన రఘుపతి చేసే మోసం కులపతికి బాగా తెలుసు. అందువలన కులపతి ఎంత అవసరం వచ్చినా ఎప్పుడు రఘుపతిని మాత్రం అడగలేదు.

కులపతికి ఒకసారి డబ్బు బాగా అవసరం అయ్యింది. ఊరిలో ఎవరి దగ్గర అంత సొమ్ము లేకపోవటంతో గత్యంతరంలేక కులపతి డబ్బు కోసం రఘుపతి దగ్గరకు వెళ్ళాడు.

"ఆహా! చిక్కాడు చేతిలో కులపతి!!" అనుకుంటూ రఘుపతి ఆనందపడ్డాడు.

బాగా ఆలోచించి "సరే కులపతి! నీ అవసరం చూసి మనసు కరిగి ఇస్తున్నా. కానీ ఒక షరతు! నీవు గడువులోపల తీసుకున్న డబ్బు తిరిగి ఇవ్వకపోతే నీ శరీరం నుంచి 1 కేజి మాంసం తీసుకుంటాను!!" అని అన్నాడు.

తప్పనిసరి పరిస్థితుల్లో రఘుపతి షరతుకి అంగీకరించి డబ్బు తీసుకుంటాడు కులపతి.

కానీ కులపతి అనుకున్న గడువులోపు తీసుకున్న డబ్బు తిరిగి ఇవ్వలేకపోతాడు.

ఇదే సదవకాశం అనుకుని రఘుపతి ఈ విషయాన్ని ఊరి  పంచాయితీలో పెద్దల దగ్గరికి తీసుకువెడతాడు.

రఘుపతి గురించి బాగా తెలిసిన ఊరి పెద్దలు విషయం అర్థం చేసుకుని కులపతిని పిలిచి " నీవు రఘుపతి డబ్బు తిరిగి చెల్లించలేకపోతే నీ శరీరం నుంచి 1కేజీ మాంసం రఘుపతి కోసి తీసుకోవటానికి ఒప్పుకున్నావా!!" అని అడుగుతారు.

కులపతి " అవును" అని సమాధానమిస్తాడు.

అప్పుడు ఊరి పెద్దలు ఒక నిర్ణయానికొచ్చి, "సరే! రఘుపతి నీవు న్యాయబద్దంగా నీకు రావాల్సిన 1 కేజీ మాంసం కులపతి శరీరం నుంచి తీసుకో, కానీ ఒక్క బొట్టు నెత్తురు కూడా రాకూడదు. ఎందుకంటే షరతు ప్రకారం 1 కేజీ మాంసం మాత్రమే తీసుకోవాలి గనుక. అలాకాకుండా 1 కేజీ మాంసంతోపాటు ఒక్క బొట్టు రక్తం వచ్చినా 1 కెజికన్నా ఎక్కవ మాంసం కోసినా నీకు మరణ శిక్ష వేస్తాము." అని అంటారు. రఘుపతి తాను తీసుకున్న గోతిలో తానే పడేలాగా!!!!

రఘుపతికి ఉరి పెద్దల సమయస్ఫూర్తితో ఇచ్చిన తీర్పు అర్థమయ్యింది. తన డబ్బు తనకి తిరిగి రాకపోగా పరువు కూడా పోయింది. ఇంక చేసేదేముంది "తను తీసుకున్న గోతిలో తానే పడ్డాడు!!!!" అనుకుంటూ తిరిగి మాట్లాడకుండా ఇంటికి వెళ్ళిపోయాడు.

అందుకే అన్నారు పెద్దలు," ఎవరు తీసిన గోతిలో వారే పడతారు" అని.

అంటే ఎవరైనా ఎవరికైనా అపకారం తలపెట్టాలనుకుంటే అది వారికే జరిగినప్పుడు ఈ సామెతను ఉపయోగిస్తారు.

ఈ సామెత కథ మీ అందరూ చదివి సందర్భానుసారం ఉపయోగించండి అప్పుడే తెలుగు భాష వర్ధిల్లుతుంది.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀

Slow And Steady Wins The Race: The Cliché But From Grandma Stories | Grandma Telugu Stories Hare And Tortoise

నిదానమే ప్రధానం

 

దండకారణ్యం అనే అడవిలో అన్ని జంతువులూ చక్కగా కలసి మెలసి ఉండేవి. ఆ అడవికి రాజైన సింహం తన ప్రజలైన అన్ని జంతువులని చాలా బాగా చూసుకునేది.

ఆ ఆడవిలోకి ఒక కుందేలు కొత్తగా వచ్చింది. దానికి తాను అత్యంత వేగంగా పరుగెత్తగలదని ఎంతో గర్వం. ఒకరోజు చెరువులో నీళ్లు తాగుతుంటే ఒక తాబేలు అటువైపుగా నెమ్మదిగా నడుచుకుంటూ రావటం కనిపించింది. ఇంకేముంది అసలే గర్విష్టైన కుందేలు తాబేలుని చూసి నవ్వటం మొదలుపెట్టింది.
తాబేలు, "మిత్రమా!! ఎందుకు నవ్వుతున్నావ్ ?" అని అడిగింది.

అప్పుడు గర్విష్టి కుందేలు తాబేలు దగరికి వెళ్లి వేళాకోళంగా ఇలా అనసాగింది, " సరదాకి మనం ఇద్దరం ఒక పరుగు పందెం పెట్టుకుందాం, ఆ పరుగు పందెంలో గెలిచినవారికి ఒక సంవత్సరంపాటు ఓడిపోయినవారు ఆహారం తెచ్చిపెట్టాలి." అని.

దానికి తాబేలు సరే!! అంది.

ఈ వార్త క్షణాల్లో అడవిలోని జంతువులన్నిటికి తెలిసింది. ఇంక పోటీ తేదీ, స్థలం, పోటీ ఎక్కడినుంచి ఎక్కడికి అని నిర్ణయించారు. గర్విష్టి కుందేలు తనకు సాటి పోటీ లేదు అనుకోని ఇంక సంవత్సరం పాటు తాను ఆహారం కోసం వెతకాల్సిన పనిలేదని కలలు కనసాగింది.

కళ్ళు మూసి తెరిచేసరికి పోటీ రోజు రానే వచ్చింది. అనుకున్న సమయానికి అనుకున్న స్థలానికి గర్విష్టి కుందేలు, తాబేలు ఇంకా అడవిలోని జంతువులన్నీ చేరాయి.
సింహం న్యాయనిర్ణేతగా పోటీ మొదలైంది, చూస్తుండగానే కుందేలు దూసుకుపోయింది.

గర్విష్టి కుందేలు "కాస్త అలసట తీర్చుకుందాం!! ఆ సోంబేరి తాబేలు ఎప్పటికి నన్ను దాటేను," అని ఒక చెట్టు నీడన విశ్రాంతి తీసుకుందామని ఆగింది. ఇంకేముంది అప్పటికే పరిగెత్తి అలసిన గర్విష్టి కుందేలుకి మంచి నిద్ర వచ్చి నిద్రపోయింది.

మరి తాబేలేమో! నిదానంగా ఎక్కడా ఆగకుండా పోటీ గమ్య స్థలానికి చేరుకొని తన పరుగు పూర్తిచేసింది. విచిత్రమేమిటంటే తాబేలుకి కుందేలు ఎక్కడ కనిపించలేదు.

ఇంతలో కుందేలుకి మెలుకువ వచ్చి గమ్య స్థలానికి పరుగెత్తి వెళ్ళింది. అప్పటికే అక్కడి చేరుక్కన్న తాబేలును చూసి ఆశ్చర్యపోయింది.

పోటీ ముగియటంతో సింహం తాబేలుని పోటీ విజేతగా ప్రకటించింది. అడవిలోని జంతువులన్నీ ఆనందంతో చప్పట్లు కొట్టి తాబేలుని మెచ్చుకున్నాయి.

గర్వభంగమైన కుందేలు తాబేలుకి క్షమాపణలు చెప్పి ఆ సంవత్సరమంతా తానే తాబేలుకి ఆహారం తెచ్చి పెట్టి తన తప్పు సరిదిద్దుకుంది.

అందుకే అన్నారు పెద్దలు, "నిదానమే ప్రధానం" అని.

చూసారా పిల్లలూ!! ఆ గర్విష్టి కుందేలు చివరికి నిదానమే ప్రధానం అని తెలుసుకుంది.

ఈ సామెత కథ మీ అందరూ చదివి సందర్భానుసారం ఉపయోగించండి అప్పుడే తెలుగు భాష వర్ధిల్లుతుంది.

Grandmas Stories will bring you more Telugu stories, language resources, and many more....😀😀😀✨🎉

Keep reading Telugu stories...🎉🎉☕☕✨😀